ROXAS CITY – Gin-athag sang Public Information Officer sang Roxas City PNP nga magatuman ang Philippine National Police natuhoy sa pagpangdakop sa mga vape-user sa pungsod.
Ginpahayag ni Police Master Sergeant Ramil Arcangeles nga ginahimo lamang nila ang ila trabaho bilang mga katapo sang mga law enforcers nga dakpon ang mga naga-vape sa pampubliko nga lugar kasunod sa pag-anunsiyo ni Presidente Rodrigo Duterte nga igadumili na sini ang paggamit kag importasyon sang nasambit nga produkto bangud sang malain nga epekto sa ikaayong lawas sang tawo.
Apang, ginklaro ni Arcangeles nga ila lamang imbitaron sa pulisya ang sin-o man madakpan nga nagagamit sang vape ukon e-cigarettes para hatagan sang nagaigo nga impormasyon kag pag-intiendi tuhoy sa paggamit sini.
Magluwas diri, ipatawag man nila ang mga grupo sang mga indibidwal ukon mga nagabaligya kag nagagamit sang vape diri sa siyudad sang Roxas.
Dugang pa sini nga wala pa sila sang Implementing Rules and Regulation ukon IRR nga nabaton kabahin sa pag-upod sang iban pa nga mga ahensya sang gobyerno angut sa pag-implementar sini.
Nagakadapat lamang nga tun-an sang maayo ang Executive Order nga ginpirmahan ni Presidente Duterte natuhoy sa nationwide smoking-ban sa pampubliko nga lugar.
Matandaan sang damlag lang, ginkumpirmar sang Department of Health nga isa ka 16-anyos nga babaye gikan sa Central Visayas ang nag-angkon sang lung injury matapos ang paggamit sang vape.
