ROXAS CITY, CAPIZ – May yara na sang persons of interest ang Roxas City Police Station sa nagbuno-patay sa 22 anyos nga lalaki sa Barangay Punta Tabuc, syudad sang Roxas.
Ang biktima amo si John Mark Tanael , residente sang Barangay Banica, Roxas City.
Sa interview sang Bombo Radyo kay Police Chief Master Sergeant Ramil Arcangeles, Spokesperson sang Roxas City Police Station, iya ginpahayag nga antes pa man nabun-an si Tanael, nakit-an sa Closed Circuit Television (CCTV) footage nga may yara ini sang gina-istorya nga duha ka mga lalaki.
Suno kay Arcangeles, ginaalegar nga nagabaisay ang mga lalaki bangud sa utang.
Pahayag niya, malakat na kuntani ang biktima sang gilayon ini nga ginhawiran sang isa sa mga suspek kag ginbuno.
Nakabaton na lamang sang tawag ang kapulisan nga may yara sang tawo nga ginbuno sa Punta Tabuc.
Gindala pa sa ospital ang biktima apang ginbawian ini sang kabuhi.
Sa subong, tinguhaan sang kapulisan nga mabuksan ang cellphone ni Tanael agud mahibaluan kun sin-o ang iya kaistorya antes natabo ang krimen.
Narekober sa biktima ang cellphone, balisong kag glass tooter.
Wala naman ginadula sang Roxas PNP ang posibilidad nga may kaangtanan ang krimen sa iligal nga droga.
Apang gin-athag ni Arcangeles nga wala sa Barangay Drug Abuse Council (BADAC) watchlist ang biktima.
