ROXAS CITY – Ginaengganyo sang kapulisan ang mga biktima sang gabunan nga kawatan nga si Tanya nga magpasaka sang nagakaigo nga kaso.
Suno sa tagpamaba sang Roxas City PNP nga si Police Chief Master Sergeant Ramil Arcangeles nga dapat magpasaka sang kaso ang mga biktima batuk sa nasambit nga kawatan agud indi na makaguwa kag makapanghalit pa matapos nga madamo na ini sang rekord nga pagpangawat sa syudad kag subong man para indi mauyang ang pagpanikasog sang mga kapulisan nga madakpan ini.
Nahibaluan nga may mga biktima nga indi na luyag magpasaka sang kaso bangud luyag na lamang sang mga ini nga ibalik ang mga butang nga ginkawat sa ila.
Narekober ang pila ka mga pagkabutang nga ginkawat ni Tanya sa ginarentahan sini nga balay sa Phil. Railway St. Brgy. IX, Roxas City nga sa karon yara sa paghinakop sang Roxas City PNP kag ginapa-verify sa nagapanag-iya nga mga biktima.
Matandaan nga nadakpan si Tanya sang damlag lang matapos maaresto bangud sa pagduso sang iligal nga droga sa Barangay Culasi, Roxas City sang damlag lang.
Nagpositibo man ini sa drug test kag napasakaan na sang kaso nga paglapas sa Republic Act 9165 ukon Comprehensive on Dangerous Drugs Act of 2002.
Sa karon nagapabilin ini sa kustodiya sang Roxas City PNP para sa nagakaigo nga disposisyon.
