ROXAS CITY -Padayon ang imbestigasyon sang Roxas City Police Station agud matumod ang duha ka mga suspek nga nagtiro-patay sa biktima nga si Joniffer Borda sa Barangay Bolo, Roxas City.
Sa interview sang Bombo Radyo kay Police Master Sergeant Ramil Arcangeles ginpahayag sini nga padayon ang ila pagpakig-angut sa mga establisyemento nga may yara sang CCTV footages nga klaru ang kuha.
Suno kay Arcangeles nga may yara na sila sang nasekyar nga CCTV footages apang kinahanglan pa nila ang bulig sang mga technical experts para ma zoom ang kuha sini.
Dugang pa ni Arcangeles nga nagasantu ang description sang mga suspek sa mga gintuad sang mga nakasaksi sandig sa kuha sang CCTV.
Suno kay Arcangeles madamo nga lukpok ang nabatian sang mga nakasaksi kun sa diin sang natumba na sa motorsiklo ang biktima, ang backride nga suspek ang nagpanaog sa motorsiklo kag nagtiro kay Borda.
Sa inisyal nga pagpangusisa sang mga kapulisan, narekober ang 5 ka mga basiyo kag bala sang kalibre .45 nga armas luthang.
Nag-angkon naman sang anom ka mga pilas si Borda kun sa diin lima ang iya igo sa lawas kag isa sa tangkugo.
Samtang ginahulat na lang sang mga kapulisan ang resulta sang Autopsy Examination sang biktima.
