Nagapanawagan ang Russia sang gilayon nga paathag gikan sa US matapos gin-anunsyo sini nga gin-aresto kag ginpahalin sa Venezuela si Presidente Nicolas Maduro kag ang iya asawa nga si First Lady Cilia Flores.
Ang Venezuela ginakabig nga pinakaimportante nga kaalyado sang Russia sa Latin America sa bahin sang negosyo kag militar. Ginakilala man sang Russia si Maduro bilang presidente sang Venezuela.
Sa isa ka pahayag, ginpabutyag sang Russian Foreign Ministry ang daku nga kabalaka sang Russia sa ginreport nga pilit nga pagpahalin kay Maduro kag sa First Lady sa ila pungsod sa tunga sang agresibo nga aksyon sang US.
Suno sa Russia, ang amo nga mga aksyon, kon matuod, nagakahulugan sang indi mabaton nga paglapas sa soberanya sang isa ka independent state, isa ka paglapas sa sadsaran nga mga prinsipyo sang international law.
Una na nga ginpakamalaut sang Russian Foreign Ministry ang ginatawag sini nga mga aksyon sang armado nga agresyon sang US batok sa Venezuela, nga nagasiling nga ang anuman nga “excuses” sa pagpakamatarong sang amo nga mga aksyon indi mabaton.
