Sales assistant, ginhold-up sa Barangay Dayao

ROXAS CITY – Tubtob sa karon wala pa makilala ang mga suspek sa pagpanghold-up sa Barangay Dayao, Roxas City.

Ginkilala ang biktima kay Melva Berbaño, 20 anyos, isa ka sales assistant kag residente sang Sitio Pagutok, sang nasambit man nga barangay.

Suno sa biktima nga pauli na kuntani ini sang gintambangan sang tatlo ka wala makilala nga mga persona kag nagdeklarar sang hold-up.

Nakuha sang mga suspek sa biktima ang kapin P5, 000 nga cash, ATM kag iban pa nga personal nga kagamitan.

Suno pa sa biktima nga ang mga suspek ang nakasuksok sang jacket nga may hood nga sakay sa tricycle nga nagaduag nga yellow.

Padayon sa karon nga gina-imbestigahan sang mga otoridad ang nasambit nga insidente.