ROXAS CITY – Nadesisyonan sang sangguniang panlalawigan nga temporaryo nga bawion ang mga rescue vehicle nga ginpanagtag sang provincial government sa mga barangay kag pila ka mga grupo para sa physical inventory agud mahibaluan kun nagakaigo ini nga mahatagan sang authorization.
Sa interview sang Bombo Radyo kay Board member Jonathan Sonny Besa, ginpahayag sini nga wala nagpangayo sang authority ang provincial government sa sangguniang panlalawigan antes nagpanagtag sang mga salakyan.
Mahibaluan, sa ginpatigayon nga session sang sangguniang panlalawigan ginpatawag diri si Mr. Eduardo Apa-ap, hepe sang Provincial General Services Office (PGSO) nahanungod sa nasambit nga isyu.
Base sa resolusyon sang SP ginhatagan nila sang natalana nga petsa ang PGSO agud tipunon ang 56 tanan ka mga rescue vehicle para sa inventory.
Gintuad man ni Besa, nga luyag gid lamang nila mahibaluan ang ang criteria sang gobyerno probinsyal sa pagpanghatag sang nasambit nga mga salakyan.
Ginpahayag man sini nga ang mga rescue vehicle ang ginpondohan sadtong 2020 sang P25 milyon kag sang tuig 2021 liwat naman ini nga ginpondohan sang P20 milyon nga yara na sa kabug-usan nga P45 milyon ang balor sang 56 tanan ka mga behikulo.
