Gin-athag ni Sapian, Capiz Mayor Jose “Joe” Villanueva ang isyu sang tagtaganay sang cash assistance sa mga biktima sang bagyo Ramil.
Sa interview sang Bombo Radyo kay Mayor Joe Villanueva, iya ginpahayag nga madamo sang reklamo nga naglab-ot sa iya opisina nahanungod sa tagtaganay sang nasambit nga assistance.
Suno kay Mayor Villanueva, ang listahan nga nagikan sa mga barangay ang ginapasa sa Municipal Social Welfare and Development (MSWDO) kag ginapasaka man sa Regional Office sang Department of Social Welfare and Development (DSWD) agud i-validate.
Pahayag pa niya, kun wala ang pangalan sa listahan, mahimo nga magpadulong sa iya opisina agud nga mapangitaan sang pamaagi nga mahatagan sang nagakaigo nga bulig.
Nagpanawagan man ang natungdan sa mga barangay officials nga mangin tampad sa pagserbisyo kag mangin patas sa paglista sang matuod nga mga indibidwal nga naapektuhan sang kalamidad.
