ROXAS CITY – Nagpangayo sang responde sa Pilar Municipal Police Station ang isa ka seaman matapos nga nadakpan sini ang iya misis kag kirido nga nagaupod sa isa ka balay nga nahamtang sa housing unit sa Barangay Sta. Fe, banwa sang Pilar.
Ang mga imbolbado nga persona ang wala na ginhingadlan.
Nagapang-edaron sang 35-anyos ang misis sang seaman, samtang naga-edad naman sang 41-anyos ang kirido sini nga lunsay may mga kabataan na.
Sandig sa mga kapulisan nga madugay naman nga tuyo bulagan sang seaman ang iya misis apang naluoy siya kag palangga niya ini.
Mahibaluan nga wala na nagpahibalo ang nasambit nga seaman nga magapauli ini gani na aktuhan gid niya nga may yara na sang ginaupod ang iya asawa kag sa karun desidido na ini nga makigbulag.
Matapos ginpadakop ang misis kag ang kirido sini, nagkasugot nalang ang magtimbang nga bahin nga indi na magpasaka sang kaso. Samtang, natalana man nga igarelease sa karsel sang Pilar PNP ang lalaki kun magtakop na ang iya reglementary period of detention.
