Capiz– Nag-angkon sang daku nga kahalitan ang sektor sang agrikultura matapos sang lapnagon nga pagbaha sa probinsya sang Capiz.
Sa interview sang Bombo Radyo kay Atty. Shiela Artillero, Head sang Capiz Provincial Disaster Risk Reduction and Management Office, iya ginpahayag nga naglab-ot na sa 42,130 ka pamilya ukon 157,000 ka mga indibidwal ang nahalitan sang bagyo sandig sa impormasyon nga ginpakigbahin sang Department of Social Welfare and Development sang Oktubre 23, 2025.
Suno kay Atty. Artillero, nagpakigbahin man ang Capiz Provincial Agriculturist Office sang ila datos sang kahalitan sa sektor sang agrikultura kag pangisdaan sang Oktubre 23, 2025.
Sa bahin sang fisheries, may yara sang 646 ka mga manugpangisda ang apektado kag 1,056.22 hectares sang fishpond ang nahalitan kun sa diin may total nga P62, 870,957.
Sa bahin naman sang agrikultura, may yara sang 1,647 ka mangunguma sang palay ang apektado kag 1,592 hectares sang ulumhan ang nahalitan kun sa diin may total nga P31,458,783.
May yara naman sang 11 ka apektado nga mangunguma sang mais nga may 9 hectares nga apektado nga may total nga P479, 525,000 kag sa mangunguma sang high-value crops may yara sang 10 nga apektado nga nagalab-ot sa 8 hectares kag may total nga P646,500.
Pahayag pa niya, ang pagdeklara sang state of calamity sa probinsya sang Capiz ang isa ka pamaagi agud mapdasig ang pagpangayo sang bulig sa national government para sa tanan nga naapektuhan sang pagbaha.
Dugang pa sang natungdan, padayon ang ila nga pagmonitor kag pagdihon sang tanan nga imposmasyon agud mabal-an ang kabug-usan nga kahalitan nga ginbilin sang Bagyo Ramil sa probinsya sang Capiz.
Interviewed by: Bombo Roadnie Daban Dalanon via Bombohanay Bigtime
