Gin-athag ni Senator Christopher “Bong” Go nga wala ini sang nangin ano man nga partisipasyon sa “war on drugs” ni anay Presidente Rodrigo Duterte.
Ginpanginwala ni Go ang akusasyon sa iya ni anay PCSO General Manager Royina Garma nga ini ang kaupod sadto ni Duterte sa nationwide campaign nga giyera kontra iligal nga droga kag sa ginpatuman nga reward system sang kampanya.
Dugang pa ni Go, bilang anay Special Assistant to the President ni Duterte, limitado lamang ang iya nga responsibilida sadto sang pagkay-o sang scheduling, appointments kag presidential engagements sang anay presidente.
Dugang pa sini nga wala man ini sang nangin nahibaluan sa bisan ano man nga police operations sang war on drugs kag indi man ini ang naghawid sang kwarta sa opisina sang presidente bangud indi naman suno ini parte sang iya responsibilidad.
Gindepesahan man sang senador si Duterte nga paliwat-liwat nga ginmensyonar sang anay presidente nga sa idalom sang iya administrasyon, wala sini ginakunsinti ang mga wala kaluoy nga pagpatay kag bilang abogado kag prosecutor, gina-respeto sini ang layi.
Dismayado si Go bangud ginadiparahan na sang pulitika ang imbestigasyon kag ginkalipatan na man ang pagtinguha ni Duterte sa pagtapna sa krimen kag iligal nga droga.
