Ginpresentar ni Senate President Pro Tempore Sen. Panfilo “Ping” Lacson ang mga kadalag-an na sang Senate Blue Ribbon Committee sa imbestigasyon sang flood control projects sang gobyerno.
Sa iya opening statement kasabay sang pagsugod sang ikawalo nga pagdungog sa flood control anomaly sa hapon sang Lunes, Enero 19, ginpabugal ni Senator Lacson ang mga resulta sa imbestigasyon lakip na ang pagbutyag sang “key actors” sa flood control scam.
Suno sa Senador, ginpamati-an kag gindokumento sang komite ang mga ginsumpaan nga testimonya nanday Department of Public Works and Highways (DPWH) Bulacan District Engineer Henry Alcantara, Assistant District Engineer (ADE) Brice Hernandez, Jaypee Mendoza, kag sang iban pa nga ginatawag nga “Bulacan Group of Contractors” o BGC boys, sugod sang mabutyag ang Bulacan 1st District Engineering Office bilang sentro sang pinakamadaku nga korapsyon.
Dugang pa sang mamalidha , ginsundan man sang komite ang ginhalinan sang kwarta kag mga dokumento nga nagpakita sang madalom nga network sang “in-house contracting,” “bid rigging,” “padded contract costs,” kag “license renting.”
Ginlaragway man niya ang mga scam bilang “systematic,” nga nagresulta sa mga substandard nga imprastruktura kag ghost flood control projects kag napamatud-an man nga ang mga kaso sa Bulacan nagserbi lang nga portahan sang mas lapad pa nga imbestigasyon.
