Natalana nga magpasa sang resolusyon si Senate Blue Ribbon Committee Vice Chairperson Senator Erwin Tulfo nga nagatuyo nga imbestigaran kag i-repaso ang Republic Act 4566 ukon mas kilala nga Contractor’s License Law nga ginhimo sang Philippine Contractors Accreditation Board (PCAB) bilang licensing body para sa mga construction contractors.
Suno kay Tulfo, katuyuan sang review nga mahibaluan kun bala kinahanglan nga mag-agi sa pagbag-o ang layi partikular sa mga probisyon sini.
Dugang pa sang natungdan, indi niya mahangpan kun ngaa man napasar ang amo nga layi apisar nga maathag nga para lamang sa personal nga interes ang mga probisyon sa idalum sini.
Sa idalom sang RA 4566, ang mga kontraktor lamang nga may mga proyekto sa gobyerno ang mahimo mangin kabahin sang PCAB Board of Directors.
Ginpahayag man sang nasambit nga senador nga mahimo ini makabig nga ‘conflict of interest’ ang nagakatabo sa sulod sang board ilabi na kun sila mismo ang miyembro kag kontraktor sang mga proyekto nga gina-review subong sang Senado.
Subong nga Lunes ginalauman nga mapasa ni Tulfo ang resolusyon bilang kabahin sang nagapadayon nga pagbusisi sang Senado sa mga maanomaliya nga flood-control projects sa pungsod.
