Ginbalewala ni Senate President Francis “Chiz” Escudero ang alegasyon nga nahadlok siya kay Vice President Sara Duterte, rason sang pagka-delay sa pagsugod sang impeachment trial.
“Pain naman ang tanong na ‘yun. Ginagawa namin kung ano ang trabaho namin. ‘Yung mga ganyang uri ng komentaryo at pain, uulitin ko—du’n sa mga ayaw kay VP Sara at pabor sa impeachment, do’n sa mga gusto kay VP Sara at tutol sa impeachment—walang bale sa akin ‘yun,” ini ang sabat ni Escudero sa pahayag ni Akbayan party-list Rep. Perci Cendaña, nga una nga nagpamangkot kun may kahadlok bala ang lider sang Senado kay Duterte.
Suno kay Cendaña, nga amo ang una nga nag-endorso sang impeachment complaint sa Kamara batuk kay VP Duterte, ang pagtukod sang Senado bilang impeachment court ang isa ka “sagrado nga katungdanan sandig sa Saligang-Batas”, kag indi lamang isa ka temporaryo nga tikang nga nakasanto sa political agenda ukon klima sang politika.
Sa iya nga sabat, ginpahayag ni Escudero nga sundon niya kun ano ang tama kag nakasaad sa kasuguan, anuman ang mangin epekto kag kun sin-o man ang maigo.
Apang ginpakalamaot man sini ang pila ka miyembro sang Kamara nga kaangay ginadali ang proseso, kag ginsiling nga nagdugay sang apat ka bulan antes ginpadala sa Senado ang Articles of Impeachment gikan sa House of Representatives.
Interes sang Publiko ukon Proteksyon kay Duterte?
Ginakahangaw-an naman sang mga opposition lawmakers kag mga complainant gikan sa Makabayan bloc kun ginaprotektahan ayhan sang Senado si Duterte imbes nga unahon ang interes sang publiko.
Ini may kaangtanan sa pahayag ni Escudero nga ang pagtukod sang Senado bilang impeachment court nakadepende sa boto sang plenaryo sang mga senador, apisar nga nakasaad sa Saligang-Batas nga ang impeachment trial dapat “gilayon nga ipatuman” sa tion nga may mapasa na nga complaint halin sa indi magnubo sa 1/3 nga miyembro sang Kamara.
Matandaan nga na-impeach si Duterte sadtong Pebrero 5 matapos gin-endorso sang masobra 200 ka kongresista ang reklamo batuk sa iya. Kalakip sa mga alegasyon ang paglapas sa Saligang-Batas, anomalya, kag pagguba sa pagsalig sang publiko.
