Nagpakigbahin sang iya hibubun-ot si Senador Robin Padilla nga ginakasubo gid sini ang balita matapos nga ginhigadlan sang International Criminal Court (ICC) nga co-perpetrators ang iya duha ka abyan nga sanday Senators Bong Go kag Ronald “Bato” Dela Rosa, kaupod si anay Presidente Rodrigo Duterte sa ginapahayag nga “war on drugs” halin sang ini pa ang alkalde sang sang Davao tubtob nga nangin President sang Pilipinas.
Suno kay Padilla, kasubong nga “nagaulan sang luha” kag nakabatyag ini sang depresyon.
Ginpahayag man niya ang iya kabalaka kun sin-o ang magasuporta sa iya sa Senado kung mapagwa na ang warrant of arrest batok sa duha ka senador.
Dugang pa ni Padilla nga gilayun ini nga nakigsugilanon sa ila ni Go kag Dela Rosa agud hibaluon kun paano siya makabulig, kag nakig-angut man ini sa minority floor leader nga si Sen. Alan Peter Cayetano.
Nagapanawagan si Padilla sa gobyerno nga indi pagtugutan nga ipaidalum sa ICC ang mga Pilipino kag hugot nga nagpanindugan nga dapat protektahan ang soberanya sang pungsod.
Matandaan nga nangin kontrobersyal ang iya mga pahayag ni Padilla sang nagligad nga mga inadlaw, kun sa diin gintawag niya ang subong nga henerasyon nga “weak” bangud nagaka-experyensya sang ‘depression’.
