ROXAS CITY – Nagahilibion nga nagapangayo sang kaluoy sa Local Government Unit (LGU) sang Panay ang isa ka senior citizen nga kalakip sa mga pumuluyo nga ginpahalin sa unit nga ila gina-istaran.
Sa interview sang Bombo Radyo kay Nanay Carmen, ginpahayag sini nga pigado lamang sila kag wala sila sang pulian nga balay dugang pa nga wala sila sang ikasarang agud makapangita gilayon sang ila istaran kaupod ang iya bata kag mga apo.
Gin-ako man sini nga nakabaton sila sang sulat sadtong Hulyo 22, 2024 nagikan sa ila LGU kun sa diin ginahatagan na lamang sila sang tubtob Hulyo 25, 2024 agud maghalin sa amu nga unit.
Suno kay Nanay Carmen, kalain para sa ila nga gulpi lang sila pahalinon kag pa-istaran sang iban nga pamilya bangud sila ang nagtinlo kag nagtimakas nga mangin maayo ang plastar kag palibot sang balay
Mahibaluan nga sumugod 2021 sang nag-istar sanday Nanay Carmen sa Panay Ville kaupod ang iya pamilya.
Matandaan nga ginapahalin na sang Local Government Unit (LGU) sang Panay ang mga residente nga kwestiyonable ang pag istar kag illegal nga nakakuha sang balay sa Panay Housing.
