Napasakaan na sang kaso nga frustrated murder ang isa ka laborer matapos nga ginbuno ang iya kaupdanan sa ilimnan sa Barangay Amaga, Sigma, Capiz.
Matandaan nga pilason ang biktima kay alyas “Ely”, 64-anyos kag ang gintudlo naman nga suspek ang ginkilala kay alyas “Jun”, 67-anyos, lunsay mga senior citizen kag kag lunsay residente sang Purok 5, Barangay Acbo sa nasambit nga banwa.
Sa nakuha nga impormasyon sang Bombo Radyo sa Sigma MPS, ginapahayag nga samtang naga-inum-inum ang biktima kag suspek kaupod ang ila mga kaabyanan, may nagluntad nga pagbinaisay kag indi pag-intindihanay sa tunga sang magtimbang nga bahin rason nga hinali nalang nga ginbuno sang suspek ang biktima sa kamot gamit ang butong.
Dugang pa nga, ginpadulungan pa sang suspek ang biktima sa puluy-an sini agud hangkaton ang biktima apang sa pagpalapit sang biktima nga luyag lamang kun tani nga istoryahon ang suspek gulpi na lang ini nga ginlabo kabangdanan nga nagbalos man ang biktima sa pagpanglabo.
Bangud sa natabo, nag-angkon sang kapilasan sa magkatuhay nga parte sang lawas ang biktima kag suspek nga gilayon ginpadangat sa magkatuhay ngaa mga ospital agud dapatan sang nagakaigo nga pagbulong.
