Senior Citizen nga sakay sa motorsiklo patay matapos nga ginbungguan sang SUV nga salakyan sa Cuartero, Capiz

ROXAS CITY-Patay ang isa ka senior citizen matapos nga aksidente nga mabungguan sang SUV ang motorsiklo nga ginasakyan sa National Highway sang Barangay Poblacion Ilaya, Cuartero, Capiz.

Ginkilala ang biktima nga si Romeo Mayuga, 67-anyos kag residente sang nasambit nga lugar.

Sandig sa imbestigasyon sang Cuatero Municipal Police Station nga sakay sa motorsiklo ang biktima sang aksidente nga mabungguan sang Toyota Hilux nga ginamaneho ni Aurelio Galorio, 48-anyos kag residente sang Barangay Balabag, Pavia, Iloilo.

Nag-angkon sang patal nga pilas sa kalawasan ang biktima nga gindala naman sa Dao District Hospital apang gindeklarar nga dead on arrival.

Samtang nakahunong na karon sa karsel sang Cuartero Municipal Police Station si Galorio.