ROXAS CITY – Nagasupak ang same sex marriage indi lamang sa kagustuhan sang Diyos kundi mangin sa ‘natural law’ bangud wala ginapahanugutan sang Simbahang Katoliko ang pagpakasal sang pareho nga lalaki kag babaye.
Sa interview sang Bombo Radyo kay Very Rev. Fr. Jose Emilio Arturo Arbatin, ang pinuno sang Archdiocese of Capiz – Commission on Social Communications and Mass Media, ginpahayag sini nga nakasandig sa Bibliya ang pagpasilabot sang Simbahan agud ipa-intiendi sa tawo ukon ano ang maayo kag indi sang maayo.
Tawgon man suno sa iya nga legal ang same sex marriage, indi sa gihapon ini makabig nga moral bangud wala ini ginabaton sang simbahan.
Gindugang pa sini nga iya ginarespeto ang mga miyembro sang LGBT community kag ginakilala man ang kinamatarong sang bisan sin-o nga iduso ang hagna nga same sex marriage apang indi suno sa iya sang husto nga piliton ang sala nga mangin ensakto, kasubong na lamang sang pagpakasal sang pareho nga babaye kag pareho nga lalaki.
