ROXAS CITY- Pila sa mga manugpanginhas (shellfish vendors) sa Barangay Punta Cogon, Roxas City ang nagasud-an ukon nagakaon sa gihapon sang panginhason apisar sa posible peligro nga dala sini tuga sang red tide.
Ini ang ginpahayag ni Mrs. Helenie Ame, Barangay Kagawad sang Punta Cogon sang ma-interview sang Bombo Radyo.
Suno kay Kagawad, ang pagpanginhas amu lamang ang pangabuy-anan sang pila ka mga pumuluyo kag bangud ginpauntat ang pag-harvest kag pagbaligya sini dako ang epekto sini sa ila pang-adlaw-adlaw nga pagpangabuhi.
Bangud man sa wala na sang pilian, apisar nahibaluan nila nga mahimo ma-food poison nagakaon sa gihapon sila sang panginhason.
Sa pihak sini, suno kay kagawad tinguhaan nila nga maglab-ot sa city government agud magpangayo sang bulig para sa kapin 200 ka mga apektado nga vendors.
Wala man sila nagakulang paandam sa mga nagakaon sang panginhason nga limpyuhan sang maayo antes kaunon kag posible magadala ini sang peligro sa ila ikaayong lawas.
Nagapasalamat siya sa DOLE TUPAD bangud bisan paano nakabulig ini sa pumuluyo, apang indi sini masiguro nga malakip tanan nga apektado bangud 67 lang ang mahimo mangin benepisiaryo.
