ROXAS CITY – Dako ang pagsalig sang pila ka vendor nga mapahalin sa may bahin sang Burgos Talipapa, nga mabuligan sila ni Mayor Ronnie Dadivas nga mahatagan sang puwesto sa Teodoro Arcenas Trade Center (TATC).
Sa interview sang Bombo Radyo kay ‘Sabeth’ suno diri nga sumugod sang dalaga ini tubtob nagka-apo, nagapamaligya na ini sa talipapa, rason nga masubo kag mabudlay man kuntani nga madulaan ini sang income sa pang-adlaw-adlaw, apang wala ang mga ini sang mahimo bangud nag-abot na ang tion nga bawion sang tag-iya sang duta ang amu nga lugar.
Apang, bangud sa pagsinapol nga ginpatawag ni Dadivas, nabuhian suno ini sang paglaum nga indi sila pagpabay-an sang alkalde.
Ginaekspektar man sini nga indi na kaangay sang ila kita sa adlaw-adlaw ang ila ma-income kun igabalhin sila sa TATC, bangud ginapahayag nga iskedyul ang ila didto pagpamaligya.
Wala man sila makahibalo kun san-o gid sila pahalinon sa talipapa, apang posible nga sa Abril sini nga tuig nalang sila kutob.
