ROXAS CITY – Nagpanindugan ang katapo sang Sigma PNP, nagpanguna sa ginpatigayon nga buybust operation sa banwa sang Sigma nga lehitimo ang ila ginkasa nga operasyon kun sa diin nadakpan ang isa ka miyembro sang LGBTQIA+.
Sa interview sang Bombo Radyo kay PLt. Reynaldo Lata, OIC sang Sigma PNP, 3 ka bulan ang ila pagsurveillance sa nadakpan nga si Cristy Joy Evangelio kag diri natukiban nga nagaduso ini ukon nagabaligya sang iligal nga droga sa bahin sang syudad sang Roxas, Sigma, kag Mambusao.
Ang nasambit nga operasyon kabangdanan man sang mga nagreport sa ila angut sa suspek kag ginakabig pa ini nga Street Level Individual (SLI).
Ginakondinar man sini ang nagapakamalaot sa ila operasyon bangud ginahimo lamang nila ang ila obligasyon sa pagpabilin sang probinsya nga mangin malinong kag malimpyo na sa iligal nga droga, suno pa diri nga indi kilala sang pumuluyo ang matuod nga “Joy”.
Angut diri, bukas naman sila sa anuman nga reaksyon sang pumuluyo apang luyag sini nga ipaathag sa mga tawo nga nagaba-se sila sa operatiba nga naghiwat sang pagmonitor kag amu ang eksperto sa pag-usisa kag pagmanman sa mga nagaduso sang iligal nga droga.
Ginkumpirmar man ni PLt. Lata nga may yara sang body cam ang kapulisan sang nagluntad ang buybust bangud isa man ini sa ila rekisitos kun may igapatigayon nga operasyon.
Suno diri, nangin negatibo ang resulta sang drugtest ni Evangelio apang indi buot silingon sini nga indi siya kalakip sa pagpatigayon sang iligal nga buluhaton.
Samtang, buwas naman nga adlaw natalana nga pasakaan sang criminal case ang suspetsado.
