ROXAS CITY – Ginpaidalom na sa lockdown ang Sitio Paradahan, Barangay Esperanza, Jamindan, Capiz matapos nga narekord sang pinakauna nga napatay bangud sa COVID-19 sa ila banwa.
Ini ang ginkompimar ni Jamindan Mayor Mac Arthur Valdemar sang mainterview sang Bombo Radyo.
Nahibaluan nga ginbawian sang kabuhi ang 58-anyos nga lalaki matapos nga nagpositibo ini sa nasambit nga balatian.
Bangud diri, suno kay Valdemar nga ginpakamaayo nga ipaidalom sa lockdown ang nasambit nga sitio sang amo nga barangay agud malikawan ang paglapta sang kaso sang amo nga balatian.
Ginpahayag ni Valdemar nga ang napatay nga covid19 patient ang residente sang Barangay Esperanza sang nasambit nga banwa nga may yara sang close contact sa nagpositibo sa COVID-19 nga residente sang Barangay Culasi sining siyudad.
Ang napatay ang kalakip sa vulnerable group bangud may yara ini sang ginasuprehir nga balatian nga Chronic Kidney Disease kun sa diin tatlo na ini ka semana nga ginpaidalom sa dialysis.
Dugang pa sang amo nga opisyal nga na-cremate naman ang bangkay sang nasambit nga indibidwal.
Magluwas diri, padayon man nga ginabantayan ang lugar kun sa diin nagpositibo man ang isa sini ka himata nga nakahalubilo man sa amo nga indibidwal.
Hugot man nga ginamonitor ang mga indibidwal nga nakahalubilo sa amo nga pasyente partikular na sa iya sini mga himata.
Nagpanugyan naman ini sa mga pumuluyo nga indi mag panic bangud ginahimo man sang lokal nga gobyerno ang tanan nga mga pamaagi agud wala sang may malatnan sang virus.
Sa karon nagapadayon ang contact tracing sang mga otoridad sa mga naka-close contact sa napatay nga COVID-19 patient.
Sa pangkabug-usan naglab-ot na sa 12 ang kumpirmado nga kaso sang COVID-19 sa banwa sang Jamindan kun sa diin isa diri ang ginakabig nga aktibo nga kaso.
