CUARTERO, CAPIZ – Wala sang malain nga record kag mabuot ang SK Chairman sang Barangay Bitoon Ilaya, Cuartero nga gintiro sa Barangay Poblacion Takas sa amu nga banwa.
Sa interview sang Bombo Radyo kay Kagawad Artelie R. Candido, posible na-tripan ang SK Chairman nga si alyas Enric, 24-anyos kag ang mga kaupdanan sini nga sanday alyas Ben, 20-anyos kag alyas Carl, 24-anyos nga lunsay SK Kagawad kag mga residente sang Brgy. Bitoon Ilaya sa nasambit nga banwa.
Base sa imbestigasyon sang Cuartero Municipal Police Station, nagtulukay lang ang mga biktima kag suspek samtang yara sa isa ka balaligyaan sang burger sa Poblacion Tacas.
Ginapahayag nga nagsinggit ang 37-anyos nga suspek sa 36-anyos sini nga manghod nga tiruhon ang mga biktima. Gilayon man nga gintuman sang manghod nga suspek kag gintiro ang mga biktima.
Naigo sa wala nga dalunggan ang Sk Chairman nga si alyas Enric samtang sa buli naman naigo si alyas Ben kag masuwerte nga wala naulamid ang kaupod pa sang mga ini nga si alyas Carl.
Gilayon naman nga nadakpan ang 37-anyos nga suspek sa ginpatigayon nga hot pursuit operation sang mga kapulisan kag nakahunong sa karsel sang Cuartero PNP samtang nagapabilin naman nga at large ang 36-anyos nga manghod sini nga ginatudlo nga gunman.
