Solterito patay, ginikanan kag mga utod naospital matapos nagkaon sang tahong

ROXAS CITY – Patay ang siyam ka tuig nga solterito samtang ginabulong sa ospital ang iya nga ginikanan kag duha ka utod matapos magkaon sang tahong ukon green shells sa Barangay Binaobawan, Pilar, Capiz.

Sa interview sang Bombo Radyo Roxas kay Punong barangay Marilyn Belalo sang Barangay Binaobawan, Pilar, Capiz, ginpahayag sini nga gindala sa Bailan District Hospital ang lima ka miyembro sang pamilya sang solterito, matapos makabatyag sang pagpangluya, pagpangbinhod sang kalawasan, pagpalanuka kag pagsakit sang ulo dala sang pagkaon sang tahong nga nangin sud-an nila kagab-i.

Ginpakaon pa sang gata nga may asukal ang nasambit nga pamilya antes gindala sa ospital.

Sa karon nag-ayo na ang pamatyag sang amay kag utod sang solterito.

Magluwas sa Barangay Binaobawan, Pilar, may reported case man sang pagpalanuka sang pila ka lang residente sa Barangay Rosario, Poblacion.

Samtang, nagpaguha na sang Executive order si Mayor Arnold Perez nga temporary nga ginadumilian ang pagkaon, harvest, transport sang anuman nga sahi sang shellfish nga gikan sa Pilar bay.