ROXAS CITY – Nagpangisog nga magpalapit sa Bombo Radyo ang 20 anyos nga lalaki agud ireklamo ang pagpanghimulos nga ginhimo sa iya sang kapareho sini nga lalaki sa isa ka barangay sa siyudad sang Roxas.
Suno sa biktima nga si alyas Marlon, nag-inom sila sang suspek nga si alyas Rico sa balay nga iya gina-estaran nga sadto may okasyon.
Magapauli na kuntani ang suspek apang iya ini nga ginpunggan bangud hubog na kag ginpanugyanan nga didto na lamang magkatulog.
Apang nagpakatig-a si Rico nga magpauli kag naghinyo ini nga magapadul-ong sa ila balay.
Agud masiguro nga makapauli sang hilway ang suspek, ginpakamaayo ni Marlon nga ihatod ini apang sa baylo nga magpauli, gindala siya sang suspek sa planta nga iya ginatrabahuan.
Suno sa biktima nga ginpahog siya ni Rico nga patyon kun indi ini mag-upod kag magpati sa iya igahambal.
Suno pa sa iya nga gindala siya sa isa ka hulot, ginpahublas kag didto na ini ginhimuslan.
Dugang pa sini nga ginsulod sang suspek ang kinatawo sini sa iya nga alatrasan.
Halos apat ka oras siya nga ginhimuslan sang suspek antes ini gin-untatan.
Sa karon, nagasinggitan sang hustisya ang soltero kag luyag nga mapasabat ang suspek sa ginhimo sini nga kababuyan.
