ROXAS CITY – Sa mga may asawa ukon bana, paano kamo nagkilalahay sang imo pinalangga?
Hambal nila, ang paghiguma nagaabot sa wala ginalauman nga lugar, petsa ukon hitabo, pareho na gid lamang sa istorya nanday Mr. and Mrs. Reymond kag Mercy Dionero sa banwa sang Tapaz, kun sa diin, nagkilalahay ang mga ini pinaagi sa pagkomento sang lalaki sa laragway sang babayi.
Sa interview sang Bombo Radyo kay Reymond, tumandok sang Agambulong, Jamindan, ginsiling sini nga nagsugod ang ila love story sang 2018 kun sa diin, ginsuyaan sini ang laragway ni Mercy sa Facebook bangud sa iya kataason, nga isa ka Overseas Filipino Worker (OFW) sa Dubai, sang amu nga tion.
Bangud friend gid lamang sila Facebook, aminado naman si Mercy tumandok sang San Nicolas, Tapaz, nga ginsupladahan sini si Reymond bangud sa nangin komento sini.
Sa pahayag naman ni Mercy, suno diri nga ginhangkat niya ang lalaki nga unahon pangaluyag ang iya ginikanan antes ini, kun matuod ang iya pagpalangga sa dalaga.
Apang, bangud seryoso si Reymond, nagpadulong ini sa balay sang dalaga bisan pa nga wala pa ang mga ini nagkitaay sang personal, diri kag napahumok ni Reymond ang balatyagon ni Mercy kag sang nakapauli ang dalaga sang 2021, gilayon ang mga ini nga nagplano sang ila kasal.
Disyembre 17, 2022, ginhiwat ang pagtambi-palad sang duha kag nangin viral pa ini bangud sa ila pinasahi nga mga kagamitan sa kasal, kaangay sa paggamit sang dahon sang saging bilang ila pinggan, butong nga ginhimo nga sulodlan sang ila pagkaon, mga handa nga ginalakipan sang binakol, sinugba nga pantat, panulse kaangay sang baye-baye, biko, puto kag madamo pa.
Suno kay Mercy, ginplanuhan sini kun paano mangin simple kag makatipid sa ila kasal apang memorable, bangud para sa iya, indi kinahanglan nga maggasto sang dako sa kasal, ang importante amu ang inyo pag-updanay kag ang bendisyon sang Simbahan.
Mensahe man sini sa mga kababainhan, nga magparespeto sa lalaki, testingan kun ano ang ila sarang mahimo sa ila ginapahayag nga pagpalangga kag mangin praktikal sa kabuhi.
Sa karon, naga-edad na ang mga ini sang 33 kag 34 anyos, kag ginahulat ang ginapangayo nga grasya sa Ginoo nga amu ang kabataan.
