ROXAS CITY – Nagapangasubo sa karon ang pamilya sang 18 anyos nga soltero nga nasapwan nga wala na sang kabuhi sa sulod sang ila nga balay sa Barangay Balangisag, Cuartero, Capiz.
Ginkilala ang biktima nga si Aljohn Apoldo, residente man sang nasambit nga lugar.
Mahibaluan nga nakit-an sang iya tiyo nga barangay kagawad nga si Roger Agustin ang biktima nga wala na sang kabuhi sa sulod sang ila balay.
Sa interview sang Bombo Radyo kay Joseph Apoldo, tiyo sang biktima, ginpahayag sini nga ginpainom ang iya nga gumangkon sang pakaisa sini nga si Reggie Agustin sang likido gikan sa ginhalo nga langgaw, toyo, asin, badyawan, kag dulaw nga ginapahayag bulong sa tawo nga ginyanggaw.
Suno diri nga luyag lamang kuntani sang iya pakaisa nga mag-ayo ang biktima rason nga ginsunod sini ang ginpanugyan sang iya ginkonsulta nga ‘mediko’.
Suno kay Joseph nga kasunod sang pagkapatay sang amay ni Aljohn sadtong bulan sang Enero nga ginsundan sang pagkapatay man sang iloy sini sadtong bulan sang Hulyo, ila na-obserbahan nga masami ini naga-istorya nga naga-isahanon kag nagalagaw nga wala sang pang-ibabaw nga panapton.
Nagapati si Joseph nga tuman nga na-depressed ang gumangkon sini apang sang nagkonsulta ang iya pakaisa sa isa ka ‘mediko’, ginpahayag nga gin-yanggaw si Aljohn.
Sa baylo nga mag-ayo, makahalangusbo ang natabo sa biktima bangud nasapwan na lamang ini nga wala na sang kabuhi kasunod sang iya pag-inom sang nasambit nga likido.
Nagapati ang tiyo nga ang likido nga ginpainom sang ‘mediko’ ang nag-utas sa kabuhi sang iya gumangkon rason nga ginpaidalom nila sa autopsy ang bangkay sang biktima.(PHOTO FROM WEB)
