ROXAS CITY – Ginkumpirma sang gobernador sang probinsiya sang Capiz nga i-dungan sa iya kaadlawan sa masunod nga bulan sang Nobyembre ang State of the Provinces Address (SOPA).
Ginpahayag ni Governor Esteban Evan Nonoy Contreras nga naghatag sang suhestyon ang pila ka mga department heads kag ang provincial administrator nga agud kumpleto nga ma-deliver sa mga Capizeño ang report sang iya nahimuan sa sulod sang 1st 100 days nga pagdumala sa probinsiya, i-dungan na lamang ini sa iya kaadlawan sa masunod nga bulan.
Magluwas diri suno sa opisyal nga memorable pa ini bangud may idugang nga mga aktibidad agud mag-enjoy man ang magatambong sa nasambit nga kahiwatan./
Kalakip sa mga nahimuan sini sa 1st 100 days sa pagserbisyo bilang gobernador ang amat amat paghatag katumanan sa 6K development agenda sang administrasyon kag ang katuyuan nga mapalapit ang gobyerno sa mga pumuluyo
Aminado man ini nga indi sini ma-please ang tanan partikular ang mga kasumpong sa pulitika kag mga kritiko sa diin ginabantayan ang iya mangin SOPA agud mabatian ang iya nahimuan.
Ginpanindugan ni Governor Contreras nga indi mangin balasehan ukon masukat sa sulod sang 100 ka adlaw ang mga nahimuan sang isa ka pulitiko.
Mas maayo suno sa opisyal nga sa baylo pangitaan siya sang sala sang mga kasumpong sa pulitika, mas maayo nga magbuligay na lamang sila bangud malayo pa ang 2022 election.
Naghinyo si Contreras sa iya mga kritiko nga hatagan ini sang tsansa nga mapamatud-an ang iya ikasangkol nga dumalahan ang probinsiya, bangud himoon sini ang tanan agud mapaayo ang buwas damlag sang mga Capizeño.
Ginpasiguro man sini nga indi maapektuhan ang iya focus ukon concentration sa ginahimo sang iya detractors, bangud yara na sa iya pinsar ang handum nga mabuligan ang mga pumuluyo sa probinsiya sang Capiz./
