ROXAS CITY-Padayon ang pagbaton sang Social Security System (SSS) sa mga miyembro nga luyag mag-apply sa Calamity Loan Assistance Program (CLAP) sa probinsiya.
Ini ang ginkompirmar ni Mr. Rene Moises Gonzales, Branch Head sang Social Security System sang mainterview sang Bombo Radyo.
Ginpahayag ni Gonzales nga magabaton ang ahensiya sang application tubtob sa Setyembre 14, 2020.
Suno kay Gonzales nga sarang maka-apply ang mga aktibo nga miyembro sang SSS online pinaagi sa pagbisita sa ila nga website nga My.SSS.
Dugang pa sini nga dapat nakakumpleto sang 36 ka bulan ukon tatlo katuig nga kontribusyon ang aplikante kag nakatigayon nga mahulogan ang last 6 months nga kontribusyon sini agud maaprubahan sang ahensiya.
Kalakip man sa mga rekisitos nga dapat i-comply sang mga aplikante amo ang pagsumiter sang bank account.
Apang, gin-athag sini nga dapat kaugalingon nga bank account sang aplikante ang dapat i-sumiter.
Sarang naman nga makabaton tubtob P20,000 ka pesos ang isa ka benepisyaryo apang nakadepende ini sa suweldo kag sa iya nangin kontribusyon.
Gin-athag man ni Gonzales nga sarang man sa gihapon nga maka-apply sang Calamity loan ang aplikante apisar nga may yara na ini sang ginabayaran nga salary loan.
Mahibaluan ang Calamity Loan Assitance Program sang ahensiya ang gindihon agud mabuligan ang mga miyembro nga apektado sang COVID-19.
