ROXAS CITY – Nagaserbe nga ‘runner’ sang mga nagagamit sang iligal nga druga ang street food vendor nga nadakpan sa drug buy bust operation sang mga kapulisan sa Brgy. Ibaca,Pres Roxas, Capiz.
Ini ang ginpahayag ni Punong Barangay Jeffrey ‘Nenet’ dela Cruz, sang Barangay Poblacion Elizalde, President Roxas sang mainterview sang Bombo Radyo.
Pahayag sang kapitan, nga ulihe na lang na monitoron ang hulag sang suspek kag natukiban nga ini ang ginagamit sang mga nagagamit sang iligal nga druga agud malikaw sa dakpanay.
Matandaan nga nadakpan si Aleck Clynt Cullamco, pinaagi sa isa ka pulis nga nagpakuno-kuno nga poseur-buyer, isa ka sachet ang ginbaligya sang suspek sa baylo sang P1,100 nga buybust money.
Suno kay dela Cruz, madugay na nga ila residente si Cullamco kag wala man ini nalakip sa Barangay Anti-Drug Abuse Council (BADAC) list.
Samtang, ginaengganyo man sini ang mga nagahimo kag naggamit sang iligal nga druga nga untaton na ang malain nga buluhaton kag boluntaryo na nga magsungka bangud ang druga ang makaguba sang kabuhi kag buas damlag sang isa ka persona.
