ROXAS CITY – Ginhimo na nga palangabuhian sang subject sang drug buy bust operation ang iligal nga aktibidad sa Sitio Sto. Niño, Barangay Baybay, Roxas City.
Ang subject sang operasyon amo si Roy Roberto Arcenas , legal ang edad kag residente sang nasambit nga barangay.
Lakip man sa nadakpan amo si Janelle Gallo, live in partner ni Arcenas, residente sang Brgy. Manapla, Negros Occidental; Peter John Javelina, residente sang Guimaras, kag si Doroteo Laporteza.
Sa interview sang Bombo Radyo kay Punong Barangay Erwin Oroceo, iya ginpahayag nga madugay man ang monitoring kay Arcenas kag kagab-i lang nahatagan sang kahigayunan nga madakpan ini sa bulig sang Philippine Drug Enforcement Agency, PNP Regional Intelligence Unit – Provincial Intelligence Team – Capiz, kag Roxas City Component Police Station.
Nakuha sa paghinakop sang apat ka mga durugista ang lima tanan ka sachets sang suspected shabu.
Suno kay Punong Barangay Oroceo, padayon ang pagbantay sang barangay officials sa mga aktibidad sang mga residente kag ginasiguro nga indi maapektuhan ang mga kabataan bangud madamo sang mga estudyante nga masami naga-standby sa Sitio Sto. Niño.
Ang mga nadakpan ang pasakaan sang kaso nga paglapas sa Republic Act 9165 ukon “Comprehensive Dangerous Drugs Act of 2002.”
[Interviewed by Bombo Sunnie Mae Batencila]
[Photo: ctto]
