Naghupa na ang sunog nga nagluntad sa Wang Fuk Court residential tower sa Tai Po, Hongkong sang Miyerkules, Nobyembre 26, 2025.
Sa interview sang Bombo Radyo kay Hongkong Correspondent Honey Mae Canacan, iya ginpahayag nga sa walo ka tuig na niya nga nagatrabaho sa amo nga pungsod, ini ang una nga kahigayunan nga iya na-encounter nga amo kadakmol kag kadako nga sunog nga natabo.
Suno kay Canacan, yara sa masobra 19 ka mga firetrucks kag madamo nga mga bombero ang nagbuligay sa pagpalong sang kalayo.
Madamo sang mga residente ang naapektuhan sa diin nga base sa pinakaulihi nga datos nga narekord sang mga otoridad, yara sa 44 ka mga indibidwal ang kumpirmado nga napatay samtang yara naman sa masobra na 300 ka mga tawo ang nadula.
Maswerte naman nga wala sang mga Pilipino nga napatay sa amo nga hitabo, apang sa gihapon naapektuhan bangud nga wala na sila sang mga pagkaon kag mga bayo bangud naubos na sang sunog.
Nagapanawagan sa subong ang natungdan sa mga kaangay man nga OFW sa Hongkong nga magpalab-ot sang bulig sa mga Pinoy pamaagi sa paghatag sang pagkaon kag bayo nga amo gid sa subong nga kinahanglanon.
Samtang, ginsigurado man sang natungdan sa iya sini nga pamilya sa Pilipinas nga indi magkabalaka bangud yara siya sa maayos nga kahimtangan.
Interviewed by Bombo Sunnie Mae Constantino Batencila
