ROXAS CITY – Dako gid nga bulig ang igatukod nga Super Health Center sa Barangay Pawa, Panay, Capiz, nga programa nagikan sa pagpanikasog sang opisina ni Senador Christopher Lawrence “Bong” Go.
Ini ang ginpahayag ni Mayor Vicente “Vic” Bermejo, sang mainterview sang Bombo Radyo.
Suno sa alkalde, malipayon ini bangud personal nga nagpadulong sa Pawa, Panay si Senador Go, agud tambungan ang groundbreaking ceremony para sa nasambit nga proyekto, nga madugay na ginhinyo sang ila Local Government Unit (LGU).
Dugang pa ni Bermejo, nga ginpili ang Barangay sang Pawa nga pagatukuran sang nasambit nga health facility agud malapit ini sa mga residente sang iban pa nga coastal barangays kaangay sang Buntod, Lat-asan, Jamul-awon, Navitas, Bantigue, Butacal kag parte sang Lanipga, nga indi na kinahanglan magpadulong sa Municipal Health Center bangud sa kalayuon.
May yara ini sang pondo nga P10 million para sa edipisyo kag dugang nga P2 million sa mga instrumento.
Nahibaluan nga may kalaparon sang masobra sa 1,000 square meters ang nasambit nga lugar, nga amu ang rekisitos sang programa.
Sa karon, yara na ang pondo sa lebel sang region kag iga-download ini sa local level kag sa tion nga yara na ang pondo sa ila LGU, pagasuguran na ang konstruksyon sang Super Health Center nga posible antes magtakop ang tuig 2023, mangin operational na ini.
Pagadesisyunan man sang ila LGU ang pagpahamtang sang mga medical personnel sa nasambit nga health facility.
