Bastante ang supply sang barato nga bugas sa P20 kada kilo tubtub sa katapusan sang 2025 suno sa Department of Agriculture (DA).
Ginhimo ni DA spokesperson ASec. Arnel de Mesa ang paathag bangud suno sa iya may yara pa sang 400,000 metric tons sa karon sa imbentaryo sang National Food Authority (NFA), katumbas sang 250 million metric tons (MT) sang bugas.
Suno sa opisyal sang DA, mahimo nga madugangan ang inisyal nga alokasyon nga 250,000 metriko tonelada para sa subsidized rice program sang gobyerno.
Sa subong, barato nga bugas ang ginabaligya sa mga vulnerable sectors kaangay sang mga senior citizens, persons with disabilities (PWDs), solo parents, kag mga katapo sang Pantawid Pamilyang Pilipino Program (4Ps), nga ginpalapad man sa mga minimum wage earners.
Ang mga panimalay nga kwalipikado nga benepisyaryo sang programa ang mahimo makabakal sang tubtob 30 ka kilo sang bugas kada bulan.
