ROXAS CITY – Nabusog ang mga bisita sa ginpatigayon nga Panginhas festival 2023 sa Barangay Buntod, Panay, Capiz, kadungan sa nagahilapit nga selebrasyon sang kapistahan sang ila Patron nga si Sr. San Juan Bautista.
Sa interview sang Bombo Radyo kay Punong Barangay Felipe Base, ginpahayag sini nangin madinalag-on ang ila labing-una nga ‘unli seafood festival’ sa ila barangay kag natigayon ini pinaagi sa ila pagbuligay nga mga barangay officials kag mga pumuluyo.
Suno diri ini ang ila imbukada nga aktibidad sa pagsug-alaw sang ila kapistahan sa palaabuton nga Sabado, Hunyo 24.
Ginkalipay man sang Punong Barangay nga sa 150 nga tickets nga may balor nga P200 kada isa, sold-out ini kag may mga walk-ins pa.
Nagpadulong man suno diri si Vice Governor Jaime Magbanua kag pila ka mga Board kag SB member sa ila banwa.
Sa balor nga P200 paayaw nga natilawan sang mga nagpadulong ang mga seafood kaangay sang alimango, kasag, talaba, tahong, hipon, litob kag madamo pa.
