Nag-resign na si Surigao del Sur 1st District Rep. Romeo Momo Sr., bilang miyembro sang Bicameral Conference Committee (Bicam) para sa ginaduso nga P6.793 trillion 2026 national budget.
Ginpanindugan ni Momo nga indi pag-ako sang sala ang iya desisyon kundi bilang pagtahod sa legislative process.
Suno sa iya, luyag sini nga malikawan nga maguyod ang budget deliberation sa mga personal nga isyu nga ginapautwas batuk sa iya.
Matandaan nga kahapon nga adlaw ginpasakaan ini sang kaso nga plunder, graft kag iban pa ni Atty. Mary Helen Polinar Zafra, nga nagarepresentar sang mga grupo halin sa Surigao.
Ang bicam ang ginabug-usan sang mga tiglawas gikan sa Senado kag Kamara nga nagasapol agud mag-isa sang nagkalain-lain nga bersyon sang national budget.
Lakip sa mga prayoridad sang 2026 budget amo ang edukasyon, ikaayong lawas, imprastraktura, kag mga social protection programs.
Sa Kamara, ang Appropriations Committee Chair nga si Mika Suansing nagapanguna sa bicam kaupod ang iban pa nga mga kongresista.
Nagapati si Momo nga makabulig ang iya pagbiya sa pwesto agud mapabilin ang kredibilidad kag integridad sang proseso sang national budget.
