Indi na magpasaka sang kaso ang mga utod sang suspek nga aksidente nga nakatiro-patay sa ila iloy sa Sitio Hinagdan, Barangay Dapdapan, Sapian, Capiz.
Sa interview sang Bombo Radyo kay alyas “Dexter” magulang sang suspek, ginpahayag sini nga timprano pa sang hapon nakainom ang iya manghod kag may dala ini nga shoulder bag nga may sulod nga armas-luthang.
Tuyo lang man tani nga sawayon sang ila iloy ang iya manghod kag kuhaon ang armas agud malikawan ang disgrasya, apang nag-inagaway ang mag-iloy rason nga nakuha sang suspek ang armas kag nagresulta sang aksidente nga pagpitik sang gatilyo kag naigo ang paa sang biktima.
Dugang pa sini indi intensyon sang iya manghod nga tiruhon ang ila iloy kag aksidente lamang ang natabo.
Gintinguhaan pa nga salbaron ang kabuhi sang ila iloy, apang ginbawian ini sang hulam nga kabuhi samtang ginabulong matapos nga ginpahayag nga nahubsan ini sang dugo.
Ginapangabay man ni Dexter nga kun tani mahangpan sang mga utod sang ila iloy ang ila mga desisyon bangud suno sa iya madamo na sang problema ang ila ginapangatubang.
