ROXAS CITY – Ginkakibot sang suspek nga nagpatay kag ginaalegar naghimulos pa antes patyon ang isa ka iloy sang ginserbehan siya sang warrant of arrest sang katapo sang kapulisan sa Barangay Lonoy, Sapian, Capiz.
Sa ekslusibo nga interview sang Bombo Radyo kay Ludovico Vera Evarista, 62- anyos kag residente sang nasambit nga barangay, kag amu ginatudlo nga suspek, ginkalain sang iya buot nga ginpasibangdan siya nga suspek sa pagpatay sa iya man kalapit balay kun sa diin iya man nga abyan ang asawa sini.
Suno diri, nagpadulong siya sa baybay sang aga dala ang iya pisi kag bugsay nga iya gingamit sa trabaho sa tahungan kag alas 10:00 na nakapauli sang nagluntad ang insidente.
Wala niya ginadahum-dahom nga siya ang ginakabig nga suspek bangud sa 34 ka tuig sini nga nagapuyo sa ila barangay wala pa siya nakatilaw nga mapasakaan sang kaso kag kilala naman siya sang mga tawo.
Ginpanginwala man ni Evarista ang iya nabasa nga sulat sa affidavit sang witness kun sa diin ginpahayag nabatian siya nagsinggit “kun mabal -an ko may nagapanguha sang akon tanum, patyon ko”, suno diri isa ini ka mababaw nga rason para patyon niya ang biktima.
Dugang pa sini, luyag niya mahibaluan kun ano ang motibo kun ngaman siya ang suspek kag gintuad nga wala sang ebidensya ang pulis nga amu ang nag-imbestigar sa lugar sang insidente apisar masami naga-agi siya diri.
Ginakasubo man ni Evarista ang mangin balatyagon sang iya kabataan kag kauturan nga amu ang indi kapati nga mahimo niya ang kapareho nga krimen.
Matandaan ginpasakaan sang kaso nga “Murder” ang suspek kag nakahunong sa karon sa karsel sang CIDG Capiz para sa nagakaigo nga disposisyon.
