ROXAS CITY -Ginkompirmar sang tag-iya sang Gold Claw Security Agency nga may yara sang daku nga kantidad sang kwarta nga dala ang biktima nga si Mr.Joniper Borda nga ginluthang patay sa Barangay Bolo, Roxas City.
Sa pagpangusisa sang Bombo Radyo kay Retired Colonel Judy Ballejo, tag-iya sang nasambit nga security agency ginpahayag sini nga ginabulubanta masobra sa P200,000 ang dala nga kantidad ni Borda nga ipasuweldo kuntani sa mga guwardiya sang nasambit nga security agency.
Suno kay Ballejo nga nagapadulong na sa ila nga opisina si Borda gikan sa isa ka bangko sa siyudad sang gintambangan kag gintiro sang mga suspetsado.
Posible nga kilala ni Borda ang mga suspetsado bangud kabisado nila ang lakat sang biktima.
Ginpanginwala man ni Ballejo nga may yara sang kontra sa ila nga opisina si Borda bangud mabuot ini sa iya nga pagkakilala.
Samtang ginkompirmar man ni Ballejo nga kada-biente kag kada singko sang bulan ang ila pasuweldo sa ila mga guwardiya.
