Nagpaandam si Taiwanese President Lai Ching-te sa mga pungsod sa Indo-Pacific region nga mahimo sila ang mangin masunod nga target sang China kon masakop ang ila teritoryo.
Suno sa Presidential Office Building sa Taipei, ginpahayag ni Lai nga kon ang Taiwan masakop sang China, indi diri mag-untat ang pagpasangkad sang ambisyon sang China..
Dugang pa ni Lai nga ang masunod nga mga pungsod nga posible mabutangan sang pamahog amo ang Japan, Pilipinas kag iban pa nga mga pungsod sa rehiyon, nga suno sa iya mahimo nga maglapta pa sa Amerika kag Europa.
Matandaan nga una na nga ginpaandaman ni Chinese President Xi Jinping ang Amerika batok sa pagbaligya sang armas sa Taiwan, apang ginpahayag ni Lai nga ang US magatindog sa Taiwan kag indi ini paggamiton bilang “bargaining chip” sa China.
