ROXAS CITY – Dakop ang tatlo ka mga indibidwal, matapos ang ginpatigayon nga drug buybust operation sa Burgos St., Barangay Tanque, Roxas City.
Ginkilala ang mga nagkaladakpan nga kanday alyas “Rogel”, 40-anyos, technician, kag residente sang Barangay Banica apang temporaryo nga nagapuyo sa nasambit nga lugar, alyas “Daryl”, 29-anyos, kag alyas “Paulo”, 29-anyos lunsay mga residente sang Barangay Tanza sining syudad.
Sa impormasyon nga nakuha sang Bombo Radyo nagikan sa Roxas City PNP, nakuha sa posesyon sang mga nagkaladakpan ang 11 tanan ka sachets sang ginapatihan shabu kung sa diin 1 diri ang nabakal, P500.00 nga buybust money sa nagkalain-lain nga denominasyon, coin purse nagaduag brown, aluminium foil, kag lighter.
Suno diri, natigayon nga madakpan ang nasambit nga mga persona pinaagi sa isa ka pulis nga nagpakuno-kuno poseur buyer kag pinaagi man sa gintingub nga pwersa sang Philippine Drug Enforcement Agency (PDEA) Capiz, kag Roxas City PNP.
Kaso nga paglapas sa RA 9165 ukon Comprehensive Dangerous Drugs Act of 2002 ang paga-atubangon sang mga nagkaladakpan.
Sa karun, yara na ang mga ini sa paghinakop sang Roxas City PNP para sa nagakaigo nga disposisyon.
