Nangin madinalag-on ang tatlo ka mga estudyante nga nagpasimpalad sa ginpatigayon nga Philippine Nurses Licensure Examination (PNLE) sang bulan sang Mayo 2025.
Sa interview sang Bombo Radyo kanday James Mar Opial, Jose Emmanuelle Linaugo, kag Crizelle Kye Gicole, pareho nag-gradwar sa kurso nga Bachelor of Science in Nursing sa University sa University of San Agustin Iloilo sang 2024, ila ginpahayag nga kaangay nakibot ini sila sang nakapasar sila sa amo nga board exam sa diin tuman ini nila nga ginpasalamat sa Ginoo.
Dugang pa sang tatlo, indi man nangin madali para sa ila ang pagkuha sang exam, apang hugot ang ila nga pagpatiu nga kun para sa ila ang kadalag-an maskin ano ang matabo ihatag gid para sa ila.
Nahibaluan nga ang Philippine Nurses Licensure Examination (PNLE) isa ka importante nga tikang para sa mga aspiring nurse agud makuha ang lisensya kag makapanerbisyo sa sektor sang ikaayong lawas sa pungsod.
Samtang, nagpalab-ot naman ang tatlo sang pagpasalamat sa mga tawo nga nangin kabahin sang ila nga journey kag sa kadalag-an nga ila napagkit, ilabi na sa tagsa nila ka mga ginikanan sa suporta nga ginhatag sumugod nga sila ang nagaeskwela palang tubtob sa nangin propesyonal na.
