ROXAS CITY, CAPIZ- Dakop ang tatlo tanan ka mga indibidwal matapos nga nakuhaan sang armas-luthang sa ginpatigayon nga search warrant operation sang mga kapulisan sa Sitio Railway, Barangay Punta Tabuc, Roxas City.
Ang nagkaladakpan amo sanday alyas ‘Nito’ 38-anyos, subject person kag residente sang Barangay Dinginan, Roxas City, alyas ‘Arturo’ 42-anyos kag residente sang Barangay IX, Roxas City kag alyas ‘Dennis’, 24-anyos kag residente sang Barangay Timpas, Panitan, Capiz.
Sa interview sang Bombo Radyo kay Police Captain Merry Chris Dela Cruz, tigpamaba sang Capiz Police Provincial Office, iya ginpahayag nga base sa inisyal nga impormasyon nga ila nga hawid natigayon nga maaresto ang amo nga mga indibidwal pamaagi sa gintingub nga pwersa sang Provincial Intelligence Unit, Roxas City Police Station, kag 1st Capiz Police Mobile Force Company.
Dugang pa sini, samtang ginapatigayon ang amo nga operasyon, hinali nalang nga nagpalupok sang armas-luthang sanday ‘Arturo’ kag ‘Dennis’ rason nga nagresulta sang mainit nga tensyon.
Nakuha sa paghinakop sang mga ini ang isa (1) ka unit sang granada, isa (1) ka unit sang armas-luthang nga .38 caliber revolver kag apat (4) ka mga live ammunitions sini kag isa ka bag.
Nagapangatubang sa karon ang mga ini sa kaso nga paglapas sa Republic Act 10591 ukon “Comprehensive Firearms and Ammunition Regulation Act.”
Sa karon, nagapabilin ang mga ini sa kustodiya sang Roxas City Police Station para sa nagakaigo nga disposisyon.
Reported by Bombo Sunnie Mae Constantino Batencila
