ROXAS CITY – Padayon nga ginabulong ang tatlo ka mga persona kalakip ang lima ka tuig nga bata nga lalaki matapos nga ginbungguan sang Isuzu Crosswind nga salakyan sa Brgy. Cala-an banwa sang Panitan.
Ginkilala ang mga biktima nga sanday Joan De Felix, 23-anyos, Dindo Lamera, 34-anyos kag ang wala na ginhangadlan nga bata nga lalaki lunsay residente sang nasambit nga barangay.
Samtang ginkilala naman ang driver sang salakyan kay Marycon Bandillon, 45-anyos, isa ka manunudlo kag residente sang Brgy. Intampilan sa nasambit nga banwa.
Sandig sa traffic section sang Panitan Municipal Police Station, nagikan si Bandillon sa banwa sang Dao kag papuli na kuntani sa ila puluy-an.
Ginapahayag nga napiyongan ang amu nga manunudlo kabangdanan nga nadulaan ini sang kontrol kag nabungguan ang mga biktima nga yara sa lugar kag lumapaw sa uyapad ang salakyan nga ginamaneho sini.
Bangud sa natabo nag-angkon sang kapilasan sa magkatuhay nga kalawasan ang mga biktima nga gilayon naman nga ginpadangat sa pribado nga hospital sa syudad sang Roxas para sa dugang nga pagbulong.
Sa karun yara sa Panitan MPS ang amo nga manunudlo kag natalana nga iga release matapos ang reglementary period.
