ROXAS CITY – Dakup ang tatlo ka persona sa ginkasa nga drug buybust operation sang Philippine Drug Enforcement Agency (PDEA)-Capiz sa Barangay Libas, Roxas City.
Ginkilala ang mga nadakpan nga sanday Hadji Alisasis 28-anyos, Andi Oroceo 45-anyos lunsay residente sang nasambit nga lugar kag Froilan Magno 31-anyos residente sang Barangay San Jose, sini nga syudad.
Sa interview sang Bombo Radyo kay AI1 Johnny Boy Ybanez, team leader sang PDEA-Capiz nakabaton ang ahensya sang report nagikan sa isa ka concerned citizen nga may mga pangayaw ang naguwa-sulod sa puluy-an ni Oroceo.
Bangud sini, nagpatigayon sang validation ang PDEA-Capiz kag ginmonitor sa sulod sang 2 tubtob 3 ka bulan ang hulag sang subject person nga sanday Alisasis kag Oroceo.
Nangin madinalag-on naman ang operasyon matapos nakuha sa paghinakup ni Alisasis ang 7 tanan ka sachet sang ginapatihan iligal nga droga ginabulubanta may kabug-aton nga 25 gramos kag may estimated drug price nga P170,000.
Suno kay Ybanez, ang tatlo nga mga nadakpan ang lunsay ginakabig High Value Individual (HVI).
Sa karon, igapaidalum sa medical examination kag drug test ang tatlo kag natalana nga pasakaan sang kaso nga paglapas sa Republic Act 9165 ukon Comprehensive Dangerous Drugs Act of 2002.
