Isa ka importante nga pahanumdom para sa mga nagabakasyon nga sa luwas sang pungsod nga gamiton ang ‘sentido common’ kag indi basta lang magsalig sa gadget matapos ang natabo nga insidente sa Andorra.
Tatlo ka babayi nga turista gikan sa Taiwan ang nangin sentro sang atensyon matapos i-drive ang ginrentahan nila nga salakyan pakadto sa isa ka ski slope bangud sa sala nga direksyon nga ginhatag sang GPS navigation system.
Natabo ang insidente sa Grau Roig ski area sa Bordes d’Envalira.
Suno sa report, apisar halata na nga off-road kag madakmol na ang snow sa ila gina-agyan, nagpadayon sa gihapon ang mga turista bangud ang dalan ang ginatudlo ‘short cut’ sa ila nga kaladtuan.
Ang resulta, nagbara kag naglubong ang salakyan sa isa ka snow cannon.
Indi nangin madali ang ginpatigayon nga rescue operation bangud nagdugay sang masobra tatlo ka oras antes makuha ang salakyan nga naglubong sa snow.
Sa maayo nga palad, wala man sang may napilasan sa amo nga insidente.
Nahibaluan nga antes pa man mag-abot ang rescue, nakuha pa nga mag-pose sang tatlo ka turista sa ila salakyan nga na-stuck nga makabig bahin sang itinerary sang ila bakasyon.
