Tawi-Tawi, nagdeklara sang state of emergency bangud sa kakulang sang suplay sang krudo

Nagdeklara sang State of Local Emergency ang banwa sang Bongao sa Tawi-Tawi bangud sa kakulang sang suplay sang mga produktong petrolyo.

Sa executive order no. 22 nga ginpirmahan ni Mayor Jasper Que, nasaad nga ang Bongao ang nagaka-eksperyensya sang “critical shortage of fuel diesel and gasoline) due to the unavailability of supply sources.”

Sandig sa EO, ang nasambit nga problema ang nakaapekto na sa ila nga transportasyon, operasyon sa pagpangisda, pag-deliver sang mga nagapanguna nga balaklon, kag dalayon nga paghatag sang importante nga serbisyo sang gobyerno.

Ginapahanugotan sang deklarasyon ang paggamit sang local calamity funds kag gilayon nga pagpatuman sang mga kinahanglan nga tikang agud masolbar ang mga problema.