ROXAS CITY – Ginakabig nalang nga kapiyerdehan sa negosyo sang isa ka manugbaligya sang isda, matapos nga nabiktima ini sang peke nga kuwarta.
Sa interview sang Bombo Radyo sa indi na luyag magpahingadlan nga vendor sang isda sa Burgos Talipapa, una ini nga nabiktima sang P500 paper bill nga indi na sini matandaan kun sin-o ang nagbayad sa iya bangud sa kadamuon sang tawo nga nagabakal sa iya baligya.
Ang isa ka insidente sang Lunes nga adlaw sang may hinampang nga basketball sa Dinggoy Roxas Civic Center, ginbilin sini ang iya puwesto sa kaangay man sini vendor, nga lantaw-lantawon kun may magbakal.
Ginpahayag nga ginbaklan suno diri sang blue marlin ang iya baligya sa ginbilinan sini nga vendor, kun sa diin duha ka tig-P1,000 ang ginbayad.
Sa iya pagbalik sa iya puwesto, ginhatag man sang iya gintugyanan nga vendor ang iya benta nga gindiretso man sini tago ang kuwarta.
Apang, kahapon sang Martes, nahibaluan nalang sini nga peke ang duha ka P1,000 nga paper bill sang indi pagbatunon sang ginakuhaan sini sang isda ang amu nga kuwarta bangud natukiban nga peke ini.
Samtang, ang nauna nga P500 paper bill ang nakumpirmar sang iya bata sang ginpatsekyar sa bangko.
Bangud sini, mahinalungon na sa karon ang mga vendors sa Burgos Talipapa ilabi na sa kaangay sang fish vendor nga makapila ka beses nga nabiktima sang peke nga kuwarta.
