ROXAS CITY, CAPIZ- Nagsugod na nga magbantay ang mga katapo sang Traffic Management Unit (TMU) – Roxas City kasunod sa gahom sang Executive No. 05 ukon “An Order Prohibiting Heavy Vehicles from Passing Through the Capiz/Roxas City Bridge”.
Sa interview sang Bombo Radyo kay Mr. Gonzalo Andrada, Head sang Traffic Management Unit (TMU)- Roxas City, iya ginpahayag nga matapos ang ginpatigayon nga pagsinapol sang Hulyo 21, gilayon nila nga ginsuguran ang pagbantay sa amo nga tulay agud masiguro nga wala na sang mga dalagkuan kag mga mabug-at nga behikulo ang mag-agi diri.
Dugang pa sini, ginpahamtangan sang ila nga talatapan sang apat (4) ka mga traffic auxiliary nga magabantay sa lugar umpisa las-8:00 sa gab-i tubtob las-6:00 sa aga.
Nahibaluan nga mangin kabulig sang TMU ang Roxas City CORE Unit, Highway Patrol Group (HPG) kag Roxas City Police Station subong man ang mga Barangay Officials kag Barangay Peacekeeping Action Team (BPAT) sa mga apektado nga barangay.
Madumduman nga ang nasambit nga mandato ang ginapatuman mismo ni Roxas City Mayor Ronnie Dadivas sa tuyo nga ma-preserbar ang historic nga tulay nga naga-edad na sang 124-anyos.
Mensahe naman ni Andrada sa mga motorista nga magsunod sa ginapatuman nga mga pagsulundan sa syudad kay suno sa iya para man ini sa ikaayo sang tanan.
Interviewed by Bombo Sunnie Mae Batencila
